މެގަ އެކްސެސް ނެޓްވަރކް މެދުވެރިކޮށް ޑިޖިޓަލް ކްލާސްރޫމް

ކީރިތި ޤުރުއާނާ ބެހޭ މަރުކަޒުން ލ. ފޮނަދޫ އާއި ފުވައްމުލަކުގައި ހިންގާ ކޯސްތައް ދިރާގު މެގަ އެކްސެސް ނެޓްވަރކް މެދުވެރިކޮށް ޑިޖިޓަލް ކްލާސްރޫމްގެ ޒަރިއްޔާ އިން ކިޔަވައިދެވޭނެގޮތް މަގުފަހިކޮށްދީފި

ދިވެހިރާއްޖޭގައި އެންމެ ފުޅާދާއިރާއެއްގައި ޑިޖިޓަލް އަދި މުވާސަލާތީ ހިދުމަތް ފޯރުކޮށްދޭ ކުންފުނި ދިރާގުން މި މަރުކަޒުން ފުވައްމުލަކާއި ލ. ފޮނަދޫގައި ހިންގާ ޤުރުއާން ކްލާސްތަކަށް ހިލޭ މެގަ އެކްސެސް ނެޓްވަރކް ފޯރުކޮށްދީފިއެވެ. މި ހިދުމަތުގެ ދަށުން މާލޭގައި ހުންނަ މުދައްރިސަކަށް އެހެން ރަށްތަކުގައި ތިބޭ ދަރިވަރުންނަށް ރިމޯޓްކޮށް މި މަރުކަޒުން ހިންގާ ތަފާތު ކޯސްތަކުގައި ރަށުގައި ތިބެގެން ބައިވެރިވެވޭނެއެވެ.

ކީރިތި ޤުރުއާނާ ބެހޭ މަރުކަޒާއި ދިރާގުން މިހިދުމަތް ފޯރުކޮށްދިނުމަށް ރަސްމީ  އެއްބަސްވުމުގައި 26 މާރިޗު 2018 ގައި ވަނީ ސޮއިކޮށްފައެވެ.

މިހިދުމަތުގެ ދަށުން މިފަހަރު ދަރިވަރުންނަށް 3 ކޯހެއްގައި ބައިވެރިވުމުގެ ފުރުސަތު ހުޅުވިގެންދާނެއެވެ. މީގެ ތެރޭގައި އިމާމް ފައުންޑޭޝަން ކޯހާއި އިމާމް ޑިގްރީ ކޯހުގެ އިތުރުން ޤުރުއާން މުދައްރިސް ޑިގްރީ ކޯސް ހިމެނެއެވެ.

2016 ވަނަ އަހަރު ދިރާގުން ވަނީ ތަފާތު 4 އަތޮޅެއްގައި ކީރިތި ޤުރުއާނާ ބެހޭ މަރުކަޒަށް މި ޚިދުމަތް ފޯރުކޮށްދީފައިއެވެ. އޭގެ ތެރޭގައި، ޏ. ފުވައްމުލައް، ރ.އަލިފުއްޓާއި، އދ. މާމިގިއްޔާއި، ފ.ނިލަންދޫ  ހިމެނެއެވެ.